कुस्मा – कुस्मा बजारको छेउमा रहेको सुनसान भीरमा आजभोलि मान्छेको बाक्लो उपस्थिति हुन थालेको छ, त्यो पनि पिङ खेल्न । पहिले यो भीरमा बाँदरका बथान हिँड्थे । भीरमा रिसोर्ट र पिङ बनेपछि यहाँ मान्छेको चहलपहल शुरु हुन थालेको छ ।
कुस्मा नगरपालिका – ५ मा स्थानीय नरेन्द्रबहादुर खत्रीले १ महिनाअघि रिसोर्ट सञ्चालनमा ल्याएसँगै यो स्थान अहिले पिङको चर्चा हुन थालेको हो । अझ यहाँ पिङ खेलेको भिडियो सामाजिक सञ्जालमा भाइरल हुन थालेपछि यसबारेमा धेरैको चासो बढेको छ ।सो स्थानलाई स्थानीयले कालीगण्डकीमाथिको दाह्रे ढुंगा भन्ने गर्छन् । साँझपख एक्लै जान समेत डर लाग्ने त्यो भीरमा खत्रीले रिसोर्ट खोलेसँगै पीङ खेल्नका लागि मानिसहरुको घुँइचो लाग्न थालेको छ ।
भीरमा सञ्चालन गरिएको पीङ खेल्नका लागि बाग्लुङ, म्याग्दी, कास्की, चितवन र धादिङ, काठमाडौं लगायतका जिल्लाका मानिसहरु आउने गरेको खत्री बताउँछन् ।
उनका अनुसार यो क्षेत्रमा स्कूले विद्यार्थी आएर शौच गर्ने गर्थे । अहिले भने स्थानीय स्तरमा पर्यटक घुम्ने ठाउँ बनेको छ ।
‘आफ्नो जग्गा त्यसरी दुरुपयोग भएको देखेर आफैले केही नयाँ व्यवसाय गर्नुपर्यो भन्ने सोचले ६३२ बीसी रक गार्डेन रिसोर्ट खोलियो,’ सञ्चालक खत्री भन्छन् ।
‘पिङ खेल्नका लागि एक सय रुपैयाँको टिकट काट्नुपर्छ’ उनी भन्छन्, ‘पिक पोइन्टसम्म पुर्याइन्छ करिब डेढ मिनेन्टको हुनेछ ।’
खत्रीले यो रिसोर्टसँगै पिङ सञ्चालनमा ल्याउनका लागि हालसम्म ३० लाख खर्च गरेका थिए भने दैनिक ९० हजारसम्म कमाइरहेका छन् ।
कुनै समय उनले १ लाखभन्दा बढी कमाइ गरेको बताउँछन् । भीरको काखमा फलामका खम्बा हालेर बनाइएको पिङमा आन्तरिक पर्यटकहरु मच्चिने गर्छन् । जमिन छोडेर पिङ मच्चिएपछि कालीगण्डकीमाथि पुगिन्छ । पिङ खेल्न महिला र पुरुष दुवैको उत्तिकै सहभागिता रहने खत्रीले बताए ।
